«Աշխատավոր դասակարգի հերոս»-ը (Woking Class Hero) Ջոն Լենոնի՝ 1970-ականներին թողարկված հետբիթլզյան առաջին անհատական ալբոմի՝ «John Lennon/Plastic Ono Band»-ի երգերից է: Երգը տարբեր սոցիալական դասակարգերի մասին քննադատություն է, որը պատմում է աշխատավոր դասակարգում ծնված և մեծացող մարդու մասին: 1970 թ. դեկտեմբերին «Ռոլինգ Սթոուն» շաբաթաթերթին տրված իր հարցազրույցում Լենոնը բացատրել է. «Կարծում եմ՝ երգը ինձ նման մարդկանց համար է, ովքեր աշխատավոր դասակարգից են՝ բարձր, թե ցածր, կապ չունի: Մեզնից ակնկալվում է այս մեծ մեքենայի միջով անցնել ու մտնել միջին դասակարգեր. սա է ամբողջը: Երգն իմ փորձառությունն է և, հուսով եմ, որ զգուշացում է մարդկանց համար: Երբ ասում եմ՝ հեղափոխական երգ է, ի նկատի ունեմ՝ ոչ թե երգն ինքն է հեղափոխական, այլ երգը հեղափոխության համար է»:
Երգի պրոդյուսերներից մեկը Լենոնի երկրորդ կինը՝ Յոկո Օնոն էր, ով 1960-ականների Ֆլյուքսուս (լատիներեն «հոսել, հոսանք, հեղուկ» արմատից) շարժման անդամ էր: Ֆլյուքսուսն արվեստագետների, կոմպոզիտորների և դիզայներների միջազգային ցանց էր, ովքեր համատեղում էին արվեստի տարբեր միջոցներ և ուղղություններ: Շարժումը կարևոր դեր է ունեցել արվեստի սահմանման խնդիրը վեր հանելու հարցում:
Աշխատավոր դասակարգի հերոս
Հենց ծնվում եք ձեզ ստիպում են փոքր զգալ՝
Ոչ մի բանի համար ժամանակ չտալով:
Մինչ ցավն էնքան է մեծանում, որ ոչինչ չեք զգում:
Արժե լինել աշխատավոր դասակարգի հերոս:
Արժե լինել աշխատավոր դասակարգի հերոս:
Ձեզ նեղացնում են տանն ու ծեծում դպրոցում,
Ատում են, թե խելացի եք, հիմարից էլ՝ զզվում,
Մինչև էնքան եք գժվում, դրա մերը,
Որ իրենց կանոններին հետևել չեք կարողանում:
Արժե լինել աշխատավոր դասակարգի հերոս:
Արժե լինել աշխատավոր դասակարգի հերոս:
20-քանի տարի ձեզ տանջելուց ու վախեցնելուց
Հետո ակնկալում են, որ կարիերա կընտրեք,
Երբ արդեն էնքան վախ ունեք, որ չեք կարող գործել,
Արժե լինել աշխատավոր դասակարգի հերոս:
Արժե լինել աշխատավոր դասակարգի հերոս:
Կրոնով, սեքսով ու TV-ով ձեզ թմրեցնում են,
Եվ ձեզ թվում է՝ խելոք, անդասակարգ և ազատ եք,
Բայց, իմ կարծիքով, դեռ գրողի տարած գեղջուկներ եք,
Արժե լինել աշխատավոր դասակարգի հերոս:
Արժե լինել աշխատավոր դասակարգի հերոս:
Վերևներում դեռ տեղ կա՝ ասում եմ ձեզ,
Բայց պետք է սովորեք ժպտալ սպանելիս,
Թե ուզում եք լինել բարձունքի մարդկանց պես,
Արժե լինել աշխատավոր դասակարգի հերոս:
Այո՛, արժե լինել աշխատավոր դասակարգի հերոս,
Թե ուզում եք հերոս լինել, հետևե՛ք ինձ պարզապես,
Թե ուզում եք հերոս լինել, հետևե՛ք ինձ պարզապես:
Թարգմանությունը՝ Գայանե Մելքոմ Մելքոմյանի և Վահե Բուդումյանի:
Դիտվել է 1317 անգամ